ცხოვრება დემოკრატიულ საზოგადოებაში

წინამდებარე სახელმძღვანელო განკუთვნილია მათთვის, ვინც დემოკრატიული მოქალაქეობისა და ადამიანის უფლებათა შესახებ ასწავლის, ამზადებს სახელმძღვანელოებსა თუ სასწავლო პროგრამებს. წიგნი ცხრა თავისაგან შედგება; თითოეული თავი დემოკრატიული მოქალაქეობისა და ადამიანის უფლებათა შესახებ სწავლების ერთ კონკრეტულ ცნებას ეხება და, დაახლოებით, ოთხ საგაკვეთილო გეგმას მოიცავს. საგაკვეთილო გეგმები შედგება დეტალური ინსტრუქციებისაგან, მოიცავს მოსწავლის სამუშაო ფურცლებსა და დამხმარე მასალას მასწავლებლისათვის. ასე  რომ, ეს სახელმძღვანელო სასარგებლო იქნება როგორც დამწყები, ისე პრაქტიკოსი მასწავლებლებისა და მათი ტრენერებისათვის. წიგნში მოყვანილი მასალისა და იდეების გაცნობა გამოცდილი მასწავლებლებისთვისაც არანაკლებ საინტერესო იქნება. თუმცა სახელმძღვანელო, ძირითადად, ზოგადსაგანმანათლებლო სკოლის საბაზო საფეხურის მოსწავლეებთან გამოყენებაზეა გათვლილი, ის იმდენად მოქნილადა აწყობილი, რომ შესაძლებელია მისი მორგება სხვა საფეხურის მოსწავლეთა საჭიროებებზეც.

დემოკრატიული მოქალაქეობისა და ადამიანის უფლებათა შესახებ სწავლება მიზნად ისახავს, ხელი შეუწყოს აქტიური მოქალაქეების ჩამოყალიბებას, რომლებიც მონაწილეობას მიიღებენ დემოკრატიული საზოგადოების ყოველდღიურ ცხოვრებაში. შესაბამისად, დემოკრატიული მოქალაქეობისა და ადამიანის უფლებათა შესახებ სწავლება განსაკუთრებულ მნიშვნელობას ანიჭებს ქმედებაზე და პროექტებზე ორიენტირბულ სწავლას. სკოლა იმ გარემოდ აღიქმება, სადაც ახალგაზრდა დემოკრატიული გადაწყვეტილებების მიღებასა და პასუხისმგებლობების საკუთარ თავზე აღებას ეჩვევა. დემოკრატიული მოქალაქეობისა და ადამიანის უფლებათა შესახებ სწავლების ძირითადი ცნებები მოსწავლეთათვის მთელი ცხოვრების მანძილზე განათლების მიღების საშუალებად უნდა იქცეს.